قلت المطر قالت من اليوم ديمه-بدر بن عبدالمحسن

قلت المطر قالت من الـيوم ديـــمه

ما به رعد لا برق ماغير هـــــــتان

عشق جمع ما بين قـاع وغيمــــه

سيّل علي صدر الثري دمع الامزان

همس النديم اللي يـعاتب نديمــــه

صوت المطر كنّه تعاتيب خــــــــلان

تبسّمت لاجل اللـيالي القديمــــــــه

وقالت تذكّر قلت يابنت نسيــــــــــان

نقض الجروح اللي تشافت ظليمه

ما عاد به وصل ولا عاد هجــــران

ما للرجا في بعض الاحـــوال قيمه

و ما للعمي صبح ولو بات سهران

لاشك وينك يالقلوب السليمــــــــه

اللي تجازي عن خطا الخل غفـــران

كلن خصيم وذاق لوعة خصيمه

واللي خصيمي ذا الوقت يا بنت خســران


بدر بن عبدالمحسن